A scheene Viererbande woarn mia scho af dera Tour "Hinte in Woid":
Aus´m Land der Franken san mit fast 150 km Anlauf noa Bad Kötzing kemma: A Nernbercha af seina in Wüsten erprobten "Stoaschleuda" und oana af Franken exilierter Nordoberpfälzer mit seina Renn-BMW; vom OMGS woarn da Hermann af da "kloana" 750er Breva und i mit da Norge dabei, mia ham ner grod ca. 90 km Weg zum Startort g´hoat.
A bisserl frisch woar´s scho, meist so zwischa 9° und 12° – doa merkt ma erscht woas a guads Funktionsgwandl so alles leisten ko und erscht a so a Griffelheizung; de Straß´n in de Woildgebiete woarn abundzu a nu a bisserl feucht – muaßt ma halt a bisserl Obacht pass´n. Af´n Weg noa Solla hoat´s bei Innernzell as tröpfeln oagfangt: Do ho i an "trickanan" Routen-Haken af Grafenau g´schloagn, durt hoam mia Mittoch g´macht, danoa samma wieda weita im Grafenauer Landl umanda kurvt und dann ausse aus´m Woild mit Ziel Richtung Deggendorf; unsa Abschlußeinkehr hoam mia af der Terrasse vom Klostergasthof in Metten bei Kaffee und Kucha g´haltn – "angenehm" warm woar´s doa scho wieda.
Vo durt as hoam mia uns trennt; i ho den Nernbercha af kloane Stroaß´n links und rechts vo da A 3 noa bis Kelheim g´führt, woa er dann weita g´foahrn is af Weißenburg zu Mama und Papa. Noa 402 km woar i dann gecha Halbasieme a wieda dahoam – der Hinterreifen vo meina Norge is ezza a soweit herrunt, daß i näxte Wocha den neia afziag´n loa koa.
Woar a scheena Zeitvertreib mit a poar Spezl´n – der 2.Mai 2015.
Gruß
Tscharlie