De vom Ostermontag wetterbedingt auf Sonntag, den 30.04., – an Hexensabbat –
verschobene heimatkundliche OMGS-Tour „Quer durch d´Oberpfalz bis zur Grenz´
und z´ruck“ war a scheene Sach. As Wetter hoat paßt, ja woar sogar so guad,
daß niad ner OMGS´ler pünktlich zum Start noa Kallmünz kemma san, sondern a
a „MC-Kupferpaste“-Urgestein as Hafenlohr und a af Minga verschloag´na
Oberpfälzer, sogar a Nernbercha Guzzista woar dabei ( aba wieda amal mit da
falsch´n Maschin´ ) – so mancha hoat nu an Spezl mitbracht.
Los´zog´n samma mit 11 Guzzen und 5 Fremdfabrikate.
A bisserl muaßt ma de Tour am Anfang ändern, weil manch einer seine Vorrät an fossile Brenstoffe
nu affüll´n hoat miaß´n – aba des is füa uns ja koa Problem, mia san ja so
woas vo flexibel.
Wie dann alle g´nuach Sprit im Tank g´hoat hoam, samma af
scheene, leere Nebensträßala zum Perlsee bei Waldmünchen g´foahrn.
Durt homma Mittag g´macht, san weita im Zickzack durch unsa Hoamat zum spontan
umgeplanten Endpunkt vo dera Tour ins Waldhaus Einsiedl bei Dieberg; bis
durthi hoam se scho drei wecha familiäre Verpflichtungen ausg´klinkt.
Leida woar af der vo da Sunn „geflutet´n“ Terrasse füa uns nimma g´nuch Ploatz –
so samma halt ins Wirtshäusl eineganga.
Nach Kaffee mit und ohne Kucha hoam
se wieda a poar ausg´linkt und die Resttruppe ist mit 8 Mann af Umwege – mit
an kuarz´n Verfoahra, weil´s Hinterhauptnavi niad afpaßt hoat – zur
Eiseinkehr in Regenstauf g´foahr´n.
Zum Schluß samma nu mitananda zum Tanka
g´foahrn, weil da Sprit scho wieda furt woar – und wen treff ma doa: Unsren
„gern lang ausschlafenden“ G´spanntreiberfreind mit seim G´spusi, de hoam se
am späten Noamittag af de Suche noa uns g´macht.
Bei Kallmünz hoam mia se endgültig trennt und san hoamzu g´foahrn.
I hob den Nernbercha nu bis fast noa Berching begleit´, weil er af Weißenburg zu Mama und Papa wollt.
Umara Achte woar i dann a dahoam.
Ma kanntad a boshafterweis´soag´n: „Vom Tanka zum Mittagessen, über Kaffee
/Kucha und Eis zum Tanka“ samma heit g´faohr´n.
Und weil´s alle guad g´fall´n hoat woas und wia mia´s g´macht hoam, mach
ma´s wieda amal – in ana andern Gegend vo unsara scheena Hoamat Oberpfalz
und mia wer´n niad wieda zwoa Joahr damit warten.
Ner, sollt ma uns übaleg´n ob ma niad vo a Tankstell aus starten sollten –
is halt a wengerl blöd, weils zwischa Amberg und da Donau im Vils-/Naabtal
ner in Schmidmühlen und in Etterzhausen oane gibt; aba mia kinna ja vo
woanderst as start´n.
Da Tscharlie hoat´s g´macht und hoat a des G´schichterl g´schriem, de
Bildl´n san vom Herby und Helmut.
Hier einige Bilder von unserer Fahrt:
