Wir waren beim 30. Moto Guzzi Treffen der Hallertauer Guzzisti
Kemman san am Samstag, an 29.07.2023 zum Start: Da Hans mit seiner neichen CF as China, der Walter mit seiner Brixton ( auch aus China ), der Harald mit meiner „alten“ NORGE und i mit der „La Celeste“, meiner California EV. Wia ma vo da AVIA in Sinzing los san, woar´s nu a wengerl sonnig und trock´n. Koane zwoa Km weida samma in Bruckdorf unterm Vordach der Getreideannahme vo da alten Mühle g´stand´n und hoam a Gewitter mit an saggrischen Regenguß oag´wart. Dann samma nu etliche Km af nasse Straß´n über Kelheim, Abensberg, Geisenfeld noa Westen gen Gambach g´foahr´n. Niad amal de Straßensperr af da B 300 vor Langenbruck hoat uns afhalt´n kinna: An kloana Haken über an Km af ana Ortsverbindung, a guat rollierte Naturstraß´- ja sowas gibt´s a in Oberbayern nu – und mia woar´n in Gambach beim Treffen. Durt´n san´s groad mit da Ausfahrt g´start, woa mi kemma san – aba doa wollt´n mia eh niad mit.
De OMGS´ler Sepp as SAD und da Dieter as Ensdorf san a groad oakemma, de hoam´n se as eahnane Regenkombis g´schält. De, de imma in Gambach doa san, woarn scho so ziemle allz´samm doa. So a de Willi as Trabitz, da Karle as Schwaz, da Stade as LA, da Arnold und da Timo vom MG-Stammtisch Stauferland und viele annere, sogar eine sangesstarke und trinkfreudige Gruppe aus Catania. Später is nu da Alfred mit da V8 – Guzzi kemma und scho woar´n mia Oberpfälzer die „stärkste“ Truppe neba de Gastgeber. Da Horst as´m niederboarischen Birket is a nu mit an Viererzug kemma. Sogar a einsamer Guzzista vom Moto Guzzi Club „Baverese“ woar doa. Es san dann imma mehra wor´n. Un wia de vo de Ausfahrt leicht angenäßt z´ruck kemma san, is richtig voll wor´n am Platz.
Auf der großzügig überdachten Terrasse vo da Sportgaststätte hoam mia daweil bei Speis und Trank und viel Ratsch de zwoa oda drei kurzen Reg´nschuaer guat oag´wettert g´hoat. Mia, de „teuflischen“ Vier, hoam gecha Halbafünfe a ganz zufällig auftretendes trockenes Schönwetterloch g´nutzt und san über Wolznach, Mainburg, Pfeffenhausen, Rohr, Schierling noa Dünzling g´foahrn: 83 km trocken an der südlich vo uns mitwandernden dunklen Wolkenfront entlang. In Dünzling hoam mia uns trennt und a jeda is hoamzua g´faohrn – i hoff alle san wia i tricka dahoam oakemma.
Mei Fazit: Mia hoat´s sauguat g´fall´n !
Die G´schicht is g´schriem vom Tscharlie, Bilder folgen.